Iähr liäbä Leyt, diä wo sitzid oder ai stand,
ich begriässä eych, grad all midänand.
Bi dä Älperleyt, gsehn’i grad derä dr’biä,
wo sälber z’Alp gis sind, mid Rinder und Chiäh.
Im Uistagä ziähnd d’Älpler, dä Alpä zuä,
dr’ganz Summer hend’s ordli z’tuä.
Bi Biiswätter hed’s, vora gwachsä schiär neyd,
dr’fir isch im Aigschtä s’Gras firä gheyd.
Isch alles abgweidet, chund d’Alpabfahrt gley,
das tuäd fir vil, nu ä bsundärä Tag sey.
Ai d’Älperchilbi hend d’Älpler hech in Ehrä,
diä tuäd als Abschluss vom Summer, dr’zuä gherä.
Im Hergott dankä fir ä vergangni Summer,
fir alls Erläbti, seygs Fräid oder Chummer.
Bi dr’Älperbeamtä sind vili Bruäfständ derbiä,
all hend ja, ihri Sorgä und Miäh.
Aber ai dr’unterhaltlich Teil tuäd äs gäh,
drum tiänd miär jetz, alerlei dra näh:
Äs isch Winter i dr’Schwand – z’Cherseytä,
wo’s dr’Sepp am Namittag, gherd Bättä leytä.
Dui holsch firs Veh nu äs Fuäder Silage,
und bisch mid em Traktor unterwägs, mid dem Bagage.
Bim Gadä im Tenn chund’s dr komisch vor,
dui hesch nur nu, dr’Diächsel am Traktor.
Silo mid santem Charrä, leyd dänk irgendwo im Schnee,
oder bi dr’Schiffländi unnä, im See!
Dr’Oberderfler Gmeindspresidänt
isch sehr innovativ und viel presänt.
Miär Stanser sind ja nid soo schlächt,
aber mid dr’Poschtleitzahl, chuisch dui gar nid z’rächt.
6380, das wär’s, und erscht nu noch derbiäh,
villeicht isch’s ai ä Ohrä Numerä, vo einnä dinä Chiäh!
Das mid dr’Poscht, wär etz verbey,
aber s’nechscht Thema, isch ai nid ney.
Miär hend vom Kanton, und das isch kei Niätä,
dr’Landsgmeindplatz, chennä miätä.
Äs scheens Plätzli, under Cheschtänäbäimä,
etz chenid d’Oberderfler, vomänä eignä Dorfplatz träimä!
Aber uberä Zeys, hed’mä neyd gherd brichtä,
cha dr’Kanton, bi ihrnä Finanzverhältnis, druif verzichtä?
Dr’Finanzer Paul seid: Ä simbolischä Frankä,
vom Gmeindspresidänt äs Kaffee und persönlich Dankä!
Dr’Gehrä Walti, holt vo Lutersee, am Freytig seyni Rinder,
und stahd z’Rugisbalm, am Bähnli, wen’ä armä Sinder.
Ich ha da ä Guätscheyn, vo dr’Kantonalbank, fir’s Uifäfahrä.
Ja dä muäsch fir Samschtig – Sunntig uifbewahrä.
Nä nei, miär isch gleych wes dui machsch mid dr’NKB,
d’Haiptsach, ich ha nu dr’ 5Liber, im Portmonée!
D’Stanser Jodlerbuäbä, gahnd is Oberwallis uf ihri Reis,
ai dr’Marcel vo dr’Huob, gherd zu dem Jodlerchreis.
Är mäldet sich ab, scho gley mid Sorgä,
ich ha gnai de, eim versprochä, s’Veh z’bsorgä.
Dr’ganz Club macht im Fieschertal Rascht,
im gnai gleychä Alpäblick, isch ai dr’Chef vom Veh, z’Gascht.
Mä kennt sich und chund is brichtä,
dr’Marcel heig scheyns miässä verzichtä.
Jä nei, am Weysi isch äs niänä rächt,
wärum seid dä neyd, mey Sunntigschnächt?
Dr’Ueli, 1. Fähndler vom Krummenacher,
isch ufem Holzbui, ä richtigä Macher.
I dr’Buidä fingerlisch eppis a dr’Nagumaschinä,
und promt schiässisch, ä Nagu i Fuäss inä.
Dui as hertä Typ, hesch neyd d’scheychä,
ziehsch dr’Nagel uisä, und duäsch neyd dr’gleychä.
Scho am anderä Tag, isch zum Dokter z’gah, kei Buäss,
und dr’Schnaps vom Kaffee, scho ufem Fuäss.
Im Aawasser wird dr’Hochwasserschutz durägfiährd,
da wird, mid dr’grossä Chellä, a-griärd.
Bsunders, wenn’s Spurä vo Gisel tiänd gfindä,
de redit’s, vo altä Umwältsindä.
Da hed äs ä Deponie gha, us Grossvaters Zeytä,
s’Gisel isch nu harmlos gsi, bi denä Leytä.
S’Meischt isch hit Härd und Dräck,
ä Komedi druis machä, hed ä kei Zwäck.
Aber s’heig nu gha, än’altä Biärchruäg,
und äs paar Ziägel, wo nid sind guäd,
ai kaputtni Kaffeegläser hed mä chennä gseh,
und Schärbä vo Gschirr, nu viel meh.
Ä halbä Nachthafä und äs Seifigschirli,
und äs verroschtets Ofätirli.
Parfümfläschli, guäd erhaltä,
ä Pfannädeckäl, ganz – uraltä,
Schärbä vom’nä Bluämäväsili,
äs roschtigs Drähtli vom’nä Scheyssibäsili.
S’AFUP hed äs Theater uifgfiärd,
so hend’s de alles abgfiärd.
Wärend dem d’Laschtwägä sind fort gsuräd,
hend d’Landrät anärä Sitzig, gmuräd.
So epis derf’s doch nid gäh,
fir son’ä Bledsinn, mes ä Million uis z’gäh.
Aber diä Beamtä hend hit ä Macht,
diä sägid, wiä’s wird gmacht.
Politiker chenid nur nu schlickä,
und zu dä Sachzwäng, ja nickä.
Viel meh bleybt ihnä meischtens nimmä,
als Kreditä und Nachtragskreditä, zuä-z’stimmä.
Dr’Rothefluäh Franz hed wellä a d’Älpergmeind gah,
wo’n är doch zur Wahl, tuäd stah.
Doch dä Alass isch am Samschtig gsi,
und dr’Franz chund ä Tag hinnä dri.
Dr’Schi-Sepp hed nu nid gärä Ruäh,
sey Ubernamä trifft ihm ai, uf seys Hobbi zuä.
S’Schifahrä tuäd ihm halt viel bedeytä,
da isch är de nu voll bi dä Leytä.
Uf seyner Sprinterstrecki fahrd är allnä dr’vo,
s’dänkt niämer, das ä Senior, tuäd obä-n-inä cho.
Dr’Senior Chrischtä Robi, gahd gärä go iichaifä,
ihm muäss immer epis laifä.
Bim Guätli Schop fahrd är im Schuss, fort und druis,
da gheyd ihm, ä Getränkeharassä zum Aito uis.
Robi, a-bindä oder d’Aitotirä zuä machä,
suscht muäsch deyni Iichaifstuirä, zweimal machä.
S’vo Holzä Gottfriedä Sepp, isch als Senior nu guäd binä-nand,
schiär gleych, wiä sey 40jährig Bührer, im’nä guätä Zuästand.
Doch im Summer hed dä ä Kabelbrand gha,
nid dr’Sepp, dr’Bührer, - da hed gleitig, epis miässä gah.
Schnell flickä und poliärä, mid grosser Miäh,
bim Bührerträffä, bisch äbä ai dr’biäh.
Dr’Pfläger, Schwegler Bärti, isch Huiswart z’Stansstad,
dä weiss guäd, wiä’s mid Reklamiärä gahd.
Am halbi zwelfi, tuäsch dui Rasä meiä,
das tuäd ä Nachbuir gar nid freiä.
Dä leyted schnell a, i dr’Polizey,
diä chund zum Glick, nid so gley.
Fragid zerscht bi deyner Frai, eb är gley tiäg fertig sey,
sie miässid susch cho reklamiärä, ä chley.
Dr’ 1. Haiptma isch ä tichtigä Gschäftsmaa,
als Maler muäsch mängisch, fir Offärtstellig fort gah.
So springt am Buäsiger Andi ä Hund a,
und prompt hesch am Ärmel, ä Stuck Stoff ä-wäg gha.
Im Nachhinein bisch gsi froh,
hesch de doch, dr’Uiftrag ubercho.
Dä Tschopä chenntisch immer mitnäh, wenn’d gahsch zum nä Chund,
wer weiss, vielleicht hed dä ja ai, ä Hund.
Zeigsch dr’Tschopä, de längt’s firnä Uiftrag nu gley,
wenn’s nid bloss, ä Rehpinscher, tuäd sey.
Am Stanserhorn, Ennetmooserseytä, isch s’Bründli,
da hed ä ganzi Gruppä, äs Wald- und Jägerhüttli.
Eysä 2. Haiptma, dr’Aschwandä Rolf
gahd liäber i diä Waldhittä, as zum Golf.
So gahnd einisch äs paar vom Bründli, zu dä Chärnser is Bränd,
ai dr’Rolf isch derbiäh, bim Kafenä, bis zum Eländ.
Am spetärä Abig laiffid si wieder is Bründli retuir,
aber das isch etz, uf dem schmalä Wägli, ä heikli Tuir.
Pletzlich isch dr’Rolf, näbä Wäg cho und vertschlipft,
seyni Kollegä wärdid bleich, und sind verchlipft.
All Kollegä hend vor Heiteri zundä,
trotzdem bisch dui, imenä Loch, verschwundä.
Chemid schnell go häuffä, gherids deys Gruchs,
ich bi, i dr’Hehli, bimenä Fuchs!
Eysä 3. Haiptma, Markus Brun,
isch als Hobbichoch fir’s Salzä, immun.
As Vorstandsmitglied vo dä Rutier Swiss,
hesch bi dr’Mondwanderig ordli Schiss.
Nach derä Wanderig wird äs Ässä offeriärt,
as Hobbichoch hesch s’Ghacked i d’Herndli griärt.
I derä chaltä Nacht, ä rächtä Mockä Schmalz,
und zum uif- und abrundä, schiär ä Sack Salz.
D’Wanderer hockid zuächä, hend Hunger we Bärä,
langsam aber sicher, duäd sich dr’Eint und Ander beschwärä.
Markus z’suiffä, oder bisch nu gsond,
entweder hesch Liäbes-Chummer oder gspirsch dr’Mond!
Dä Buirä hed ä Läserbriäf, ordli gäh z’studiärä,
ä altä Landmaschinähändler tuäd da reklamiärä.
Hat der Bauer auch, Mittagsruäh?
Ja klar, wenn är nid grad hed, Dringends z’tuä.
zum Vergniägä schaffäd är nid, mittags oder i dr’Nacht,
är isch einä, wo ai gärä, Feyrabig macht.
Aber mängisch tiänd gwissi Umständ zwingä,
Arbätä ubärä Mittag, oder nachts inä z’bringä.
Miär dankid all’nä, wo s’netig Verständnis tiänd ha,
und gsehnd, das äs mängisch, nid anders tuäd gah.
Am Bührerträffä hed mä Kuriositetä chennä gseh,
und Oldteimer, nu viel meh.
Ä Bsuächer, hed Bewunderig fir n’äs Miniaito ubercho,
hockt dri, fahrd ab, druis und dr’vo.
Sie hend’s de ai nu nid gmerkt, so gley,
aber de hend’s afä suächä, mid dr’Polizey.
Nach äm Uiffindä, hed’s är miässä zrugg gäh,
hed sich das aber, nid gärä la näh.
Zum Glick hend all seyni Trick neyd gnitzt,
dä Schlaimeier hed’s gha, scho anders gschpritzt.
Ä
Buir, wo gley isch im Ruähestand,
hilft nu gärä im Jungä, im Gadä und uf’äm Land.
Filld fir sich im Chäller, nu äs Fass voll Moscht,
macht mid dem, gärä äs verdiänts Proscht.
Dr’ganz Winter, all Tag, äs Gläsli zwei,
oder ai meh, wenn är nid isch älei.
So gahd doch mängä Liter zum Fass uis,
im Friählig luägd är, wiä gsehd’s ai mid äm Vorrat uis?
Da merkt är, epis cha da nid stimmä,
äs isch ja meh Moscht als im Herbscht drinnä.
Dr’Jung heig ihm dr’Moscht nid grad wellä näh,
aber doch ordili Wasser, dr’zuä gäh.
Eysä Pail, hiä uf äm Wagä,
tiänd miär ai, mid’mä Sprichli plagä.
Im Summer bisch dui z’Alp, z’Triäbsee,
det hed dich d’Feyrwehr, wellä gseh.
Dr’Uisflug, wend sie zu diär uifä machä,
ufä 4. Septämber, muäsch bsorgä, alli Sachä.
Dr’Pail hed gha, ordli Fräid,
und de gärä, zu ihnä gsäid:
Chemid nur zu miär, i d’Hechi,
ich ha Zeyt, und bi i dr’Nechi.
Ässä und Trinkä tuän’ich fir eych, scho bschtellä,
ai ufä Grill, chenid iähr zellä.
Wo duä Feyrwehrler chemid, und vor dr’bschlossnä Bitzihittä-Tirä
stahnd
und kei Pail gsehnd, nämid sie s’Natel zur Hand.
Sie fragid: Hesch d’Feyrwehr vergässä?
Miär wettid, cho z’Mittag ässä.
Jä isch das hit? De hend iähr, mey Plan ufä Huifä gschtellt,
ich ha all’s uf morä, uf’ä Sunntig bschtellt.
Ich bi hit fort, am Morgä friäh,
uf Ziri, an’ä Uisstellig fir Muätterchiäh,
fir d’Feyrwehr, chan’ich neyme tuä,
zum z’Mittag miänd-er halt am Alpstubli zuä.
Äs schadt mängisch neyd, ä Lehrblätz z’ha,
jetz duäd eysä Pail, 50 Steak, i dr’Gfreyri ha.
Das d’Vorsteller, uber’s Jahr lehrid fähndlä, isch bekannt,
das ghert ja schliässlich, zu ihrem Amt.
Mid Miäh und Fleyss, gand sie a d’Sach,
dass dr’Fahnä nid z’mängisch, z’Bodä krach.
Jetz chend iähr eys zeigä, was iähr chend,
s’Fähndlä sind iähr eych, ja gwend,
und sett eychers Härz de gleych nu, ordli schla,
duäd eych s’Alphorntrio, zur Seytä stah.
Oh hochgschätzti Nationalrät, Engelberger - und Föhn
ä so-nä Neat, wär doch eifach schön.
Nu scheener isch diä traimhaft Idee,
mit derä Bahn, uberä ganz Stanser Bodä, uf Luzärä a See,
d’Ürner wettid wieder, i Tunnel z’Aettighüsä,
und chämtid z’Birä hinnä, wieder üsä.
Uber Stans gäbs epä zäh zuäsätzlichi Gleis
gratis - gschänkt, nid wägum Lärm und Meis.
d’Stans wettmä de, ganzi Zig parkiärä, abstellä, uberholä,
mit em Logistikzentrum zämä, gäb das Arbet, Steyrä, Cholä.
D’Uirner und Schwyzer sägid: Isi Täler sind z’äng,
drum fahrid-mer am beschtä, uber Nidwaldä, päng!
da chenämer nur so buiwä, Land zum verseywä,
mä sett meinä, kei Mänsch dät’s reywä,
dr’Nationalrat Föhn meind, sie heigid kei Land zum vergeydä,
und zudem täg’s, ä scheenä Talchessel durschneydä!
Ja und bi eys, durä Stanser Bodä, dänkid diä wenigä Gscheydä,
megs-äs dänk, ohni weyteres verleydä!
D’Nidwaldner Zeytig schreybt, vo juristisch und wirtschaftlich
abklärä,
und wemä hed chennä läsä, hät das ai eysä Edi, gärä,
Nidwaldä, chämt is Spiel und ai is Gred,
aber sind derä Spieli, nid ä chley bleed?
Und, wenn d’Neat z’mitzt dur’s Dorf durä wurd fleygä,
meinsch, wurd eysä Edi, vom Aito ufä Zug umsteygä?
Und der Fehn, land miär glaibi won-är isch,
bi dä Uirner und Schwyzer, stirmisch, warm und frisch!
Gheyd aber dr’Fehn, z’Nidwaldä z’bodä, de stelld är d’Weichä,
und meischtens chunt’s de gley einisch, gogä seichä!
Fir was wend miär d’Neat, im Nidwaldner Ländli.
Miär hend doch d’Luzern-Stans-Engelberg Bahn, im rotä Gwändli.
Stolz fahrd sie mid eys uber Hergiswil nach Luzärä,
oder dur s’Tal hinderä, uf Ängelbärg nu so gärä.
Vo dr’Obermatt is Ghärscht gahd’s schiär grad duruif,
langsam, gmiätlich durä Wald, mid schwärem Schnuif,
dr’fir hend’s Gescht umso ringer und bequem uf ihrem Plätzli,
gniässid d’Natuir, bimänä a-gregtä Schwätzli.
Das isch bereits 106jährigi Romantik und Nostalgie,
das, sell langsam aber sicher Vergangäheit sii!
Miär läbid hit inärä modernä Zeyt,
da gherid schwarzi Lecher, zum Profeyt.
So wird gloched, bohred, gschprängt und klepft,
fir d’LSE uf Ängelbärg, ä Tunnel uisägschepft.
Bi dr’altä Rampi, hesch bi Schnee und Sunnä, Natur pur,
etz miänd de all Turischtä, dur’s dunkli Loch, durdur,
aber, s’AHA-Erläbnis, wo mä regurächt däg planä,
chenn im Momänt, nur dr’Verwaltigsrat er-ahnä,
wenn pletzlich zum Loch uis, dobä bisch,
und i dr’ganzä Gressi, dr’Titlis, vor-der isch.
Aber dä Bärg, lahd sich das gar nid la gfallä,
schickt Wasser is Tal, mid Schuim und Gallä,
macht Druck im Tunnel und Terror,
dä Bärg meind, äs gäb, as Wändrohr.
Wen’ä Sturm hed sich s’Wasser i Stollä ergossä,
drum schaffid hit d’Arbeiter, mid Schwimmweschtä und Flossä.
Dr’LSE Verwaltigsrat well, vo dem Wasser profitiärä,
und seyg schwär am Planä und Organisiärä.
Brandaktuell, us 1. Hand derfid miär da brichtä,
mä well im Tunnel, ä vollaitomatischi Bahnwäschalag i-richtä.
Eis grosses Problem gäb’s, da seyg’mä ärnschthaft am beratä,
das dr’Fahrgascht, nid pletzlich zwungä seyg, zum badä!
D’Luzärä-Stans-Ängelbärg Bahn, isch ä Bahn mit Tradition,
ja, und etz stahd eysi Bahn, im Zeytgeischt vo dr’Fusion.
Ihrä Frind hed sie scho sid Jahrä, z’Hergiswil troffä,
und sind meischtens, hinderänand nachä, uf Luzärä gloffä.
Diä griän schwär Brünigbahn vo dr’SBB,
hed nateyrli das scheenä, rotweyssä Gfährt, tagtäglich gseh,
aber ihri Härz-Motorä sind fascht genai gleych gwickled,
drum hed sich da langsam, ä grossi Liäbi entwickled.
Miär dänkid, diä zwei sind ja beklobt,
nä nei, sie sind scho lengschtens verlobt.
Uf ändi Jahr, wärdi ghiratä, ohni Gägs,
und äs Chind, seyg ai scho underwägs.
Das allerdings gid scho lenger, z’dänkä, z’hirnä,
und gid Runzelä, uf mänger Stirnä.
d’LSE-Brüngibahn, stahd im Mittelpunkt,
Luzärä-Interlakä-Ängelbärg, sind Ändpinkt,
Sarnä isch dr’Zentrali Punkt, vo Obwaldä,
Stans dr’Zentrali Ort, vo Nidwaldä,
ja und d’Verbindig, is Bärner Oberland,
isch äs zentrals Aligä, leyd uf dr’Hand,
und Luzärä, Zentralä, vo dr’Zentralschweyz…
- fir das Chind, dr’richtig Namä z’gfindä, isch äs Chreyz!
Aber hit weiss mä doch alles, hiä und uberall,
susch wärdid Guätachtä gmacht, mit Ultraschall,
s’isch ai gleych, gid’s ä Buäb oder äs Meitli,
das Chind uberchund, äs rotweysses Chleidli,
und we miär wissid, gahd immer alls nach Plan,
drum heisst das Bebi, ganz eifach: Zentralbahn.
Mä seid ja nid umäsuscht, d’Haiptsach s’isch gsund und bleybt,
und nid scho gley wieder, ä Frind uiftreybt.
Einisch i dr’Nidwaldner Zeytig,
ich glaibä amenä Freytig,
han’i ä grossä Bricht gseh,
vo dr’Fusion Brünigbahn und LSE.
I dr’Mitti äs Bildli, vo eysem Volkswirtschafts-Chef,
und är gsehd ai glicklich uis, ohni Pleff,
ä wirklich scheni Foti vom Regiärigsrat Geri Odermatt,
drunder stahd: Die Hochzeit findet, demnächst statt.
Eysä 1. Pfläger, Leo Schallberger, isch doch ä Nättä,
so gahsch dui einisch, ufä Maschinähandel, z’Ämmättä.
Bim offnä Bähnli, i dr’Talstation
gisch dui obsi, is Bärgheimä, äs Telefon,
d’Frai seid: leg dr’Tschopä-n-a, dui muäsch di schitzä,
dui dänksch: bi derä Wermi, jä nei, nu hinderälitzä.
Etz hockisch ufs Bänkli, offä, frisch, dä Gnuss,
und scho chund s’Bähndli midem Leo, i Schuss.
dobä, bim Uissteygä, Frai verchlipft, jerä Gott,
Sie, Herr Schallberger, gsehnd ja uis wenä Chrott,
zum Glick hend Sie ihrä Haarwuchs, midemä Chäppi dekt.
Ä Maschinähändler, hät’s wahrscheyndli gschmekt.
Und Ihres weyssä Hämmli, isch ai nimmä z’rettä!
Miär sind nämli dra, s’Tragseil, mit frischer Schmiri, z’fettä!
Eysä Senior, Robi Chrischtä,
isch as Jungä, uf’em Birgästock uf dr’Pischtä,
damals nu, im Frei-First Imperium,
ghersch dui zum Unterhalts-Kollegium.
D’Schreynerei hesch dui betriebä,
und ei Gschicht, isch diär bsunders blibä:
Imenä Privatchalet wunderscheen,
wohnt damals, d’Sophia Loreen.
Dui muäsch i das Chalet epis go flickä,
da wotsch und chaisch dui dich, nid drickä,
mid Meter, Hammer, Zangä, Negu, Schruibä,
gasch dui ärnschthaft, epis go umächluibä.
Pletzlich bisch verchlipft, nu jung und ungestüm,
stahd diä Schenheit vor diär, im Adamskostüm.
Zum Glick Robi, bisch mid chleynä Aigä geborä,
susch hätschi duä, ändgiltig verlorä!
Dr’ 2. Statthalter, Pail Chrischtä im Glick,
juized sid Jahrä, im Jodlercheerli Brisäblick.
Iähr fahrid einisch uf Ziri, zumänä Jodleruiftritt,
nachem Konzärt gid, s’Kameradschaft pflägä, Chitt.
Dui Pail seisch nu gley: „So meyni Liäbä,
ich gahn afig, und wott mich Heizuäh verschiäbä.“
Ordili später, glicklich und zwäg,
gahnd ai, diä anderä Jodler, uf’ä Heiwäg.
Pletzlich fahd bi eim im Aito, s’Händi afä leytä,
“Sind Iähr nu z’Ziri, oder scho am Hei-reytä?
da isch dr’Pail, Gottfried Stutz“, gherid’s dich fluächä,
“bi immer nu z’Ziri, am Aito suächä.“
Dr’ Ruedi Lussi, isch 3. Statthalter,
Chatzänarr und Büsihalter.
Dui gahsch uf Terrassä ä Zigarettä go schlotä,
Katz gumpäd nachä, und bschleysst innä, mid dä Pfotä.
S’wird langsam chalt und frisch,
will dui nur, mid dr’Underwesch dussä bisch.
Priska chum’mer go uiftuä, seisch am Telifon,
ja, ja, Ruedi, ich komm ja schon!
Wo’s Priska wott uiftuä, umsverreckä,
Ruedi, dui hesch dr’Schlissel, innä la steckä.
Sofort muäs dr’Schlisselservice häräfahrä,
aber dä cha diä Sortä Schloss, nur uisbohrä.
Etz hesch 3 Chatzä i dr’Stubä, und vorussä nu eini,
aber hälfä, cha diär ä Keini!
Dui bisch vor Chälti, zämägschmurgled wen’ä Chrott,
Priska riäft: Hilf dir selbst, dann hilft dir Gott!
Dr’Liem Roli, gahd uf Oberrickäbach as Waldfäscht,
dr’Odermatt Migi, isch ai det, und nid im Näscht.
Äs isch ä luschtigi Nacht, mid langä Zeytä,
drum fragt dr’Roli dr’Migi, chan-ich mit-er Hei reytä?
Ja ja, aber meys Älpermeitli, Barbarä,
muäss ich zerscht, uf Ängelbärg, Hei-fahrä.
z’Ängelbärg seid Barbara zu denä 2 Mannä,
chemid inä, s’gid nu Kaffee, ä Channä.
Dr’Migi, a dr’liäbä Barbara sey Frind,
schlaft nu gley i, und hänkt dr’Grind.
Dui, huärä gäbig, dänkt dr’zwägig Roli,
de probiär halt ich, z’chuschälä mid dr Moli!
Ä
kaiserlichä Buir, z’Beyrä,
duäd bimänä Problem, keini Wort verleyrä.
Dä hed Siloballä zum Gadä verschobä,
etz chund-um ä Baim i Wäg, mid schenä Epfu dobä.
Dä, hed sich a miär, nid i Wäg inä z’stellä,
gahd go Motorsagi hole, und duäd’ä fellä.
Chuim gsesch dä Baim z’Bodä fleygä,
cha dr’Manfred wunderbar, weyters-beygä.
Mä cha ja fäschtä bis zum Gruisä,
aber irgendeinisch, muäs jedä pfuisä.
So sind 2 Obbirger usserscht bekannt,
amänä Fäscht, und we immer, kei prässant.
Dr’Noldi, hed diä 2 im Aito heigfiährd,
und spat i dr’Nacht, vor-em Salacher parkiärd.
Bed sind duä lengscht nimmä bi Sinnä,
und schlafid steihert hinnä-ninnä.
Dr’Noldi, was mach ich mid denä 2 Bleichä,
diä wärdid s’Aito, wohl nid verseichä,
ich lah diä ganz Aitoladig la stah,
und nimä eis vo Ihrnä, zum Heigah!
Dr’ 2. Fähndler, Scheuber Thomas,
lost im Aito Muisigkassettä, „en mass“.
Kollegä nämid dich hech,
bi derä Qualität, chund diär Keini nech.
Das Tschäder und das Gsurr,
das isch kei Muisig, das isch äs Knurr.
Verruktä bisch hei, ohni Witz,
und mondiärsch dey ganz Stereoalag, ufä Hindersitz,
Hallo Fans, chemid go luägä, losä, äs fahd grad a,
Ländler-Walzer-Jodel, dr’DiJey Thomas, isch da!
D’Stanser Jodlerbuäbä hend heyr chennä feyrä,
sie dägid s’75isch Vereinsjahr asteyrä.
Drum hend sie äs Fäscht organisiärd,
und s’Underwaldner Naturjodlerkonzärt durägfiärd.
Sie hend ä richtigä Vollträffer chennä buächä,
einzig bi dr’Tombola, hesch Träffer miässä suächä.
äs giängd chiähler,
liäbä Jodler, Flüeler!
Jetz lahnd miär s’Jodlercherli Brisäblick firä,
so hend miär Zeyt, eysi Kehlä z’schmirä.
Also Jodler, chemid firä, stahnd i d’Hosä,
miär wend diä Mannästimmä losä.
Bim Flühler Walter, i dr’Wilgass,
det herscht bi 4'000 Hiänder, Ei Ei Eierspass.
Doch einisch ghersch dr’Walti fluächä,
hinder Holzbeygä und under Aito suächä,
Eier uisnäh, butzä und verchaifä,
wurdi ja gah, wenn d’Hiänder nid wurdid dr’vo-laifä.
Dr’Flühler Sepp vo Oberdorf hed än’Uiszeichnig gwunnä,
so nä Leischtig, weisch wiä gschpunnä,
als Neuverfasser vo „Eine wilde Jagd“
isch dr’Sepp jetz meh als gfragt.
Uberall muäs är Interview gäh,
und alli wettid vo ihm vernäh,
mä gherd doch dies und das, scho munklä,
was passiärd da nachts, und ganz im Dunklä?
Mä heig’s gherä girbschä,
baitschä und umä-quitschä,
und diä Ornig, wiä nach-ärä Schlacht,
zum Glick, hed’s im Sepp und im Rosi neyd gmacht.
Epä 54 Seyw, sind im ganzä Heimä umä-gschtriäläd,
am schenschtä hend’s, im Gartä gniäläd.
Dr’Senior Dablätä Hans, hed friächer gschwungä,
diä Meischtä hesch dui, uf’ä Riggä brungä.
Kraft hesch dui gha, wiä sältä Einä,
drum hesch ai, eidgenessisches Eichälaib dr’Heimä.
Wenn’s de bi dr’Älperä, ä Hosälupf sett gäh,
chenntid’s dich, als Kampfrichter näh.
Margrit und Jost sind, als Pfläger dr’biä,
sie wend scho gley, i Alterssitz ziäh.
Und de erscht nu inä andärä Älperchreis,
da gid’s neyme vo Älperä, weder als Pfläger, nu als Greis.
Das hed nä gmacht, chley Miäh,
äs fräid sie bsunders, dass sie etz nu sind dr’biä.
Jetz
tuä’n ich nu s’Jingschti Pflägerpaar gseh,
das isch z’Alp gsi z’Triäbsee.
Sind’s ordli gfordäräd, seid Birgit i optimistischem Ton:
“Na Hugo, das schaffen wir schon!“
Bi dr’Älperä sey, drey Tag hindärä-n’and,
da heisst’s de fit sey, de bisch binä-n’and.
Dr’Pfläger Odermatt Sepp, miänd iähr Älper, i Aschpruch näh,
dä chan eych, jederzeyt ä Lektion Altersturnä gäh.
Dr’Michi vo dr’Bank, isch mid Kollegä versumpft,
später hesch nu, mid deyner Wärkstatt, uiftrumpft.
Da hend’är, dr’ganz Chiählschrank läärgsuffä,
und erscht morgä friäh, is Bett verschluffä,
wo dui am Morgä am Sächsi, uf Wil i WK setsch,
traimsch dui nu steihert, vomänä luschtigä S’Ketsch.
Wo dui de, ä chley z’spat itroffä bisch,
leyd diä Frag: Warum? ufem Tisch.
Miär isch äs schlächt, wen ich nur kei Grippä hät,
also, Herr Niederberger, sofort is K Zät.
Dr’Dokter fragt: Da schmekts doch nach Alkohol?
Ja, chli Chriter han’i gnu, mim Magä zum Wohl.
Dr’Arzt seid: Nä nei, dä Gschtank a einerä Tuir,
ich verschreybä Ihnä, ä Mundwasserkuir!
Ä
jungä Melk, z’Beyrä hinnä
hed sey Feyrwehrtschopä, immer im Aito innä,
pletzlich gahd är zum Feyrwehrmagaziner,
sey Tschopä heig äs Loch und wärdi immer chliner.
Während dem dr’Melk mid em Aito gahd go fäschtä,
sind im Tschopä hinnä-ninnä, Meys am näschtä.
Ä guätä Tip, das chennt sicher nitzä:
Midärä guätä Chatz – is Aito sitzä!
Eysä 2. Bannwart Walker Martin, cha lachä
gmiätlich sey und Muisig machä.
Ja, bim Muisigä hesch dui grossä Spass,
ai einisch amenä Wuchenänd, ufem Jochpass.
Juizä, Faxä machä bim Spilä zum Tanz,
pletzlich hend deyni Hosä, ä riesä Schranz.
Aber wo leyd s’Problem, bi somenä Kundi?
Mid Sicherheits-Nadlä, chuisch guäd uber d’Rundi.
Im Juni macht de dr’Martin Feriä, i dr’USA,
det probiärsch äs Paar, neyw scheen Hosen-a,
super Muisighosä, rassig und sehr apart,
sofort bar zahld, mid Master Card.
Chuim dr’Heimä bisch sofort drinä gschliffä,
jä nei, das hesch etz nid begriffä,
denä Amis, oder a Diär? Chentsch eis abäwäschä,
kei einizigä Hosäsack, nidämal ä Fidlätäschä!
Ä
Älper, wo äs Älpermeitli sett ha,
leyted i dr’Claudia von Moos a,
und s’Meitli, i grosser Fräid,
hed spontan ja gsäid.
Chuim abghänkt, weiss sie nimmä wem,
studiärd, wiä seid mä ai, dem?
Mid dr’Älperlischtä luägd sie, 1 – 2 – 3,
das tuäd dr’Ueli, vom Krumänacher sey.
Eysä Älpervater Leo, muäss zwischä Wiähnacht und Neujahr, gärä oder
nid gärä,
scho rein gschäftlich, seys Poschtfach go lärä.
S’isch Winter- und Feriäzeyt, da nimsch äs dui locker,
und sitzisch in’es fremds Aito, ufä Hocker.
Dui Fränzi, ich gah de grad im Pijama, gä-u,
dr’Hund, nimi de ai nu grad mit, Tschä-u.
So fahrd dr’Leo, nach guäter Zmorgä,Choscht
glicklich und zfriedä, uf Stans zur Poscht,
nachem parkiärä isch s’Poschtfach a dr’Reihä,
dr’Hund duäd we wild, afä baitschä und chreiä.
Etz stahd dr’Leo uf dr’Strass, im Pijama, i Strandfetschä mit bluttä
Flossä,
dä huärä bleger Hund hed s’Aito, vo innä bschlossä!
Dr’Aschwandä Rolf bi dr’Ännetmooser Muisig, we jedä weiss.
Sie machid uf Österreych, ihri Muisigreis.
I dr’Nechi vom Wolfgangsee, im Hotel Zinggäbachmühli,
isch Zimmerbezug und Znachtässä, im Saal mid dr’scheenä Dihli.
Zum Znacht wird gredt, blasä, trunkä,
scho is Näscht, hed dä meischtä gstunkä.
Speter nu i dr’Bar gid’s Biärli, Schnäpsli, Biärli,
und alls gahd eigentlich we am Schniärli.
Spat i dr’Nacht, dr’Mond isch lengscht am gwunderä,
seid dr’Rolf: Ich, ich sett dänk ai langsam underä.
Langsam rutschisch ab em Barhock,
bin ich etz im 1. 2. 3. oder 5. Stock?
S’Chäppi z’hinderfir und ordli rundä,
meys Zimmer han-i de nu eister gfundä.
So gahsch dui hibschli obsi, dr’Gang hinderä und wieder firä,
oi oi oi, etz isch guäd, das isch mey Zimmertirä,
da isch mey Nachtvorhang, nur nu underä, husch huschi.
Guät Nacht Rolf, schlaf guäd, i dr’Etagäduschi!
As anerkanntä Hobbichoch bisch ai im Zivilschutz, Chuchi-Chef.
Dr’Markus Brun macht das gärä und kennt dr’Töff.
Drum chenid das fascht diä meischtä nachvollziäh,
trotz hechem ZS Alter, bisch immer nu derbiäh.
Ai im Turnverein, da gfalld äs diär,
aber Turnä und secklä wen-äs Tiär,
jä nei, warum, das muäs-i nid jedi Wuchä ha,
aber bim gmiätlich sey und Schoppä Hock, isch dr’Markus da!
Dr’Liem Roland isch a s’Eidgenessisch Schwingfäscht,
det isch dr’ 3. Vorsteller nid i s’Näscht.
Da bisch aktiv gsi, und voll dr’biä,
dr’fir hed diär, dr’Tag gmacht meh Miäh.
Sie hend dich duä, längeri Zeyt nimmä gseh,
dui bisch nämli iigschlafä, uf’äm WC.
Dr’Walker Matthias und Kindig Stefan, hend gha diä Idee,
sie wellid usswärtigi Trachtä gseh.
Sie bringid, scho derä zuächä,
und giängid zum Kanton uis, go Älpermeitli suächä.
Wäg dr’Tracht, usswärts go suächä, findid ander kei Grund,
wichtiger isch fir diä, was drinnä chund.
Dr’Zwissig Philipp hed bi seynä Älperkollegä referirärd,
uber Aforderigä a Älpermeitli, hed är sie orientiärt.
Äs Älpermeitli mid Frind, das sett’s de nid gäh,
ämu är wurd de niä, ä so eis näh.
Chley später hend ihm de Kollegä, gäh z’verstah,
ai seys Älpermeitli, tiäg de, ä Frind ha.
Dr’Rothefluh Toni, bi dä Älperä Brätmeister,
forderid’s, i dr’Freyzeyt ai nu eister.
Ämter und Verein tiänd’ä i Aschpruch näh,
fir diä tuäd är, sich d’Freyzeyt näh.
Wenn all Verein mid’mä Wagä wurdid zur Verfiägig stah,
chennt är, mid denä älei, ä Umzug ha.
Im Bührerklub sey, und sälber einä ha,
de tuäsch äs Härz fir Oldteimer ha.
Dr’Gadmä Migi fahrd mid’mä Bührer umänand,
dä isch nu rächt guäd, binänand.
I dä hed är viel Zeyt inveschtiärd,
tuäd’ä pflägä, ohni d’Frag, eb’s rändiärd.
Doch einisch, isch Dä, nid gloffä,
isch ai nid gsi, versoffä.
Dr’ Migi luägd eb epis seyg verheyd,
gfindt aber, niänä neyd.
De tuäd är, ä Kenner z’Hilf näh,
dä hed ihm, dr’guäd Tip gäh:
“Wotsch dr’Traktor a-lah,
muäsch dr’Bänzinhahnä offä ha.“
Dr’Lüthi Dani, i dä lärä Underhosä,
wott is Bett, go Radio losä.
Zerscht aber nu vor’s Huis, frischi Luft go schnoicklä,
und ä guäti Zigarettä roicklä.
Tirä gheyd is Schloss, ganz im Ghäimä,
d’Schlissel im Huis und niämer dr’Heimä.
Scho chley weyt umä blutt und s’Wätter schmeizt,
zum Glick hed dr’Beat, i dr’Buirästubä gheizt.
Hoi Dani, wen ich gseh,
hätsch sicher gärn, äs heisses Tee.
Nei Beat, äs aständigs Tenü,
und uf alls abä, äs rächts Menü!
Z’Obbirgä sind ä Chacheler und ä Russ,bim Hei spaziärä, ordli im
Schuss.
So riärd äs einä uber Bord, am Strassärand,
disä riäft, „Hilfio“, är isch im Sunntiggwand.
Dr’ 1. Bannwart, Bircher Jost,
ai scho mit 2, 3 Moscht:
Ich chumä! - s’Bord isch steil,
und sichered dr’Chacheler, midemä Seil.
Pletzlich riäft d’Sandra, sey Frindin:
Chuisch dui Hei oder was hesch nu im Sinn?
Dr’Jost folged grad und gahd Hei,
diesi Zwe, kemid etz sicher ä-lei.
Was dr’Jost etz äbä nid gsehd,
diesnä gahd’s gring und cheibä bled,
uberchemid d’Ubergwicht und sind vo aller Wehri,
sie fleygid 4 Meter nidsi, i Brombeeri!
Dr’ 2. Bannerherr, Andreas Gander,
isch tatsächlich nid einä we ander,
mid 18 dr’Jüngscht Älperchnab,
seyg wägem Älpermeitli, rächt uf Trab,
das heiger de nid lang wellä uisäschiäbä,
dr’zuä nu gfragt, wett de ai, im Küssä iäbä!
Dui bisch as Beckerlehrling gar nid fuul
und bim Schnupfä, usserscht cool,
scheen uf Zeytä luägä, bim Aigä rinnä, huäschtä, gruchsä,
duä dich doch i dr’Bachstubä, mid Mähl i-fuchsä.
Dr’Zwissig Philipp, isch z’Bärg uf Niederbaiwä,
da passiärd im 2. Vorsteller, ganz ä Schlaiä.
Bim Uifschtig tuäd’s ä Paisä gäh,
är tuäd us’ärä Fläschä, äs paar Schlick näh.
Dr’Rucksack zuä und dr’Steilhang uif,
heiss isch z’laifä, und sträng dr’Schnuif.
So leyd halt ä Trunkhalt drinnä,
aber im Rucksack, findt är d’Fläschä nimmä.
Bim 1. Halt, ä Schtund weyter unnä, chennt’mä sie gseh,
Diä sofort holä, isch sey Idee.
Wiä’d wit, das isch miär Wurscht,
jetz han ich eifach Durscht!
Bi dr’Fläschä a-cho, hed sich glohnt sey Miäh,
dr’Fäldstächer, leyd nämli ai nu dr’biäh.
Vom 3. Fähndler weiss ich ai nu Einä:
Dr’Mathis Toni, isch aschpruchsvoll, wett’i meinä.
Am Waldfäscht, z’Dalläweyl, hed är äs Velo gwunnä,
dr’Toni hed tah, wiä gschpunnä.
Hed gfluächäd, wiä das wärtlos seyg,
fir ihn nitzi das gar neyd.
Mid dem, wissi är neyd a-zfah,
är liäss-es glaibi, grad la stah.
Wärisch dänk meh gsi froh,
wenn’t hättisch, 100 Kaffee ubercho.
Ä
weyterä Schpruch wetti nu einisch, am Lussi Ruedi ibrockä,
bisch uf Reisä, muäsch wen’ä Frai, allpot uf’s WC hockä.
Einisch bisch bim Media Märcht am i-chaiffä,
wott prompt muäsch, uf Tscheyssi laiffä.
Nachem Stinki machä, wotsch WC-Papeyr nutzä,
aber da isch neyme umä, zum butzä.
Jedä weiss, was das cha bedeytä,
drum duäsch dui sofort, am Chundädiänscht a-leytä.
Promt chund d’WC-Frai: Wo isch das armä Meysli?
Hiä, riäft dr’Ruedi, uf’em hinderschtä Heysli.
Bi dr’Ubergab vom Closettpapeyr, bin’i nid dr’biäh,
aber Beidi, gäbid sich, usinnig Miäh!
Z’Obbirgä gid’s Ärger, jedä Tag,
wäg-mä frisch aa-gseitä Bitz, isch Chräyäplag.
Zwe Burschtä, dr’Res und dr’Domeyni,
eigentlich nimmä ganz so chleyni,
wend mid-ärä Hasäpischtolä,
uf d’Jagd, go Chräyä holä.
Mid-em VW Passat fahrid’s zur Problemzonä,
s’Gwehr isch gladä, neyd vo schonä,
ä Schuss, äs chlepft, dui wo ligggid Chräyä?
Seich, ich ha vergässä, d’Scheybä, abä z’dreiä!
Im Chachelerstibli, gähnds wieder einisch Gas,
ai dr’Buirästubä-Beizer trinkt Biär, ganzi Maass.
Äs Telefon vom Obbirgä – da isch dr’Beat Frei,
liäbi Frai, chum mich go holä, bi diär, soo trey.
Dr’Beat gahd hindernä Baim go seichä,
Frai chund, und gahd is Stibli, go suächä.
Dr’Beat gsehd seys Aito stah,
hockäd drinä und lahd-en a.
Dr’Heimä luägsch nu zum Pfeischter uisä.
Frai vergässä. – Is Bett go pfuisä.
D’Frai, was hed si wellä?
Wott äs Taxi bschtellä,
neyme z’wellä, nur nu Händ verriärä,
zmitzt dur d’Nacht, 40 Minuitä, hei spaziärä.
Z’Fürigä, hed dr’Beat, das cheibä Fägnäscht,
i dr’Wirschaft äs Geburtstagsfäscht.
S’Gschänk isch uispackt i dr’Buirästubä,
nur ä grossi Kartonschachtlä, isch ubrig-blubä.
Dr’Bircher Domeyni isch afä miäd, s’Gägäteil wär glogä,
und hed sich mid derä grossä Schachtlä, verzogä.
Im Gartä bim Baim, äs isch scho frisch,
schleyfd är i d’Schachtlä, underä Tisch.
Das hed ihns de gar neyd gruised,
raikt nu ä Zigarettä und isch i-pfuised.
Pletzlich verchlipft dä jung miäd Maa,
und gsehd d’Obbirger Feyrwehr, vor ihm stah.
Was isch los, han ich gspunnä?
Nei, deys Kartonschachtlä-Näscht, isch verbrunnä.
Miär sind am Schluss, äs hed eys gfräid,
miär hend so mängs, verzelld und gsäid,
doch jetz Hei gah, wär doch schad,
s’hed z’Trinkä, z’Ässä, all’s parad.
Dä Ennetmooser Fraiä- und Männerturner, sei Dank,
sie schaffid fir d’Älper 04, und sorgid fir Schpeys und Trank.
Und d’Muisig spielt äs Tänzli, zwei,
gäu Sepp, da gahnd miär sicher, nuni Hei.
Bi Kaffe, Schnaps, Biär und Moscht,
bi Zigerchrapfä, Wurscht und Bratchäs als Choscht,
da bleyb ich sicher nu äs Schutzli da,
Hei-gah chan’ich de nu lang dr’nah.
Schliässlich wott ich diä Glägäheit nutzä,
und dä BSV Stans gseh, dr’Dorfplatz putzä!
Bim Älpertanz am Mändig Abä,
da cha im Ängel, ai s’Älpervolk a-trabä.
Bi dr’Muisig, Iten-Grab, wiä gsäid,
zum gmiätlich sey, ä guäti Glägäheit.
Doch jetzä säg ich: Ade midänand,
bin’ärä andärä Glägäheit, im scheenä Nidwaldnerland.
